bewafa pae gae husn ke paikar kitne

bevafā paa.e ga.e husn ke paikar kitne

phir bhī vābasta rahe un se muqaddar kitne

uTh ga.e mahfil-e-duniyā se suḳhanvar kitne

un meñ guzre haiñ sadāqat ke payambar kitne

aaj ban baiThe haiñ but-ḳhānoñ kī 'azmat ke nishāñ

mere hāthoñ ke tarāshe hue patthar kitne

ġhair mumkin nahīñ tasḳhīr-e-zamāna lekin

aap ke paas haiñ aḳhlāq ke zevar kitne

nekiyāñ kar ke bhulā denā hai sheva jin kā

dekhiye bastī meñ aise haiñ tavañgar kitne

duur kar dete haiñ ahbāb-o-aqārib ko nadīm

muñh se nikle hue alfāz ke nashtar kitne

imtihāñ le ke ka.ī baar falak ne dekhā

ḳhaak ke putle meñ poshīda haiñ jauhar kitne

rahnumā.ī kā kabhī dā'vā kiyā karte the

biich tūfān ke hamrāh the rahbar kitne

pur-sukūñ daur kī hasrat meñ ḳhudā jaane 'azīz'

dekhne hoñge hameñ ḳhuun ke manzar kitne

bewafa pae gae husn ke paikar kitne

phir bhi wabasta rahe un se muqaddar kitne

uTh gae mahfil-e-duniya se suKHanwar kitne

un mein guzre hain sadaqat ke payambar kitne

aaj ban baiThe hain but-KHanon ki 'azmat ke nishan

mere hathon ke tarashe hue patthar kitne

ghair mumkin nahin tasKHir-e-zamana lekin

aap ke pas hain aKHlaq ke zewar kitne

nekiyan kar ke bhula dena hai shewa jin ka

dekhiye basti mein aise hain tawangar kitne

dur kar dete hain ahbab-o-aqarib ko nadim

munh se nikle hue alfaz ke nashtar kitne

imtihan le ke kai bar falak ne dekha

KHak ke putle mein poshida hain jauhar kitne

rahnumai ka kabhi da'wa kiya karte the

bich tufan ke hamrah the rahbar kitne

pur-sukun daur ki hasrat mein KHuda jaane 'aziz'

dekhne honge hamein KHun ke manzar kitne