بے وفا تھا پھر بھی دنیا اس کی شیدائی ہوئی

بے وفا تھا پھر بھی دنیا اس کی شیدائی ہوئی

غم تو یہ ہے بس مرے حصے میں تنہائی ہوئی

روز محشر جس گھڑی آیا جو نامہ ہاتھ میں

ہائے کیسی اس بھری محفل میں رسوائی ہوئی

مبتلائے زعم شہرت حسرت نام و نمود

ہو گیا انسان کیسا سلب بینائی ہوئی

منکر انسان کو دنیا سمجھتی ہے حقیر

عاجزی کی اس جہاں میں کب پذیرائی ہوئی

بدلیوں کی اوٹ میں یوں چھپ گیا ماہ تمام

جیسے دلہن چہرہ ڈھک بیٹھی ہو شرمائی ہوئی

میری ہر اک بات کا بس ایک مطلب ہے اناؔ

جس کے مطلب چار ہوں ایسی نہ گویائی ہوئی