bewafa wada-shikan aur sitamgar nikla

bevafā va.ada-shikan aur sitamgar niklā

maiñ ne samjhā thā jise phuul vo patthar niklā

vo to lagtā thā hameñ shahr kā pāgal koī

ġhaur se jab use dekhā to payambar niklā

qais ham-sāya thā merā ye mujhe yaad na thā

DhūñDte DhūñDte sahrā meñ mirā ghar niklā

sar jhukāyā thā use jaan ke apne se baḌā

vo bhī afsos mire qad ke barābar niklā

mere mālik mire ehsās ko le le mujh se

merā ehsās to mere liye ḳhanjar niklā

tishna-lab pyaas se dam toḌ rahā thā jis dam

merī āñkhoñ se samundar kā samundar niklā

ek lamhe meñ pata chal gayā apnā mujh ko

jab mirā saaya mire jism se baḌh kar niklā

ho ga.e mujh se ḳhafā shahr-e-badan ke a.azā

merā bāġhī mirī bastī kā har ik ghar niklā

kis ko ilzām duuñ barbādī-e-dil kā maiñ 'umar'

merā dushman to mirā ḳhud hī muqaddar niklā

bewafa wada-shikan aur sitamgar nikla

main ne samjha tha jise phul wo patthar nikla

wo to lagta tha hamein shahr ka pagal koi

ghaur se jab use dekha to payambar nikla

qais ham-saya tha mera ye mujhe yaad na tha

DhunDte DhunDte sahra mein mera ghar nikla

sar jhukaya tha use jaan ke apne se baDa

wo bhi afsos mere qad ke barabar nikla

mere malik mere ehsas ko le le mujh se

mera ehsas to mere liye KHanjar nikla

tishna-lab pyas se dam toD raha tha jis dam

meri aankhon se samundar ka samundar nikla

ek lamhe mein pata chal gaya apna mujh ko

jab mera saya mere jism se baDh kar nikla

ho gae mujh se KHafa shahr-e-badan ke aaza

mera baghi meri basti ka har ek ghar nikla

kis ko ilzam dun barbaadi-e-dil ka main 'umar'

mera dushman to mera KHud hi muqaddar nikla