بے وفائی کا وہ دستور ہوئے بیٹھے ہیں

بے وفائی کا وہ دستور ہوئے بیٹھے ہیں

عشق میں ہم ہیں کہ بس چور ہوئے بیٹھے ہیں

ہم نے مانا تھا جنہیں شمس و قمر سے بڑھ کر

وقت آیا تو وہ بے نور ہوئے بیٹھے ہیں

دل کی دھڑکن میں جنہیں ہم نے بسا رکھا ہے

ہم سے وہ دور بہت دور ہوئے بیٹھے ہیں

اک نظر دیکھ لے اے جان تمنا ہم کو

ہم ترے عشق میں مسرور ہوئے بیٹھے ہیں

وہ نہ آئے جو شب وعدہ تو بھیجا ہے پیام

خط میں لکھا ہے کہ مجبور ہوئے بیٹھے ہیں

تھے جو سیرت میں کبھی سادگی کا آئینہ

آئنہ دیکھ کے مغرور ہوئے بیٹھے ہیں