بیزار خود نہ ہوتے اگر زندگی سے ہم

بیزار خود نہ ہوتے اگر زندگی سے ہم

اے ضبط غم فریب نہ کھاتے کسی سے ہم

تھا عرصۂ حیات محبت میں ہم پہ تنگ

کرتے رہے نباہ مگر زندگی سے ہم

شاید نگاہ لطف ہماری طرف بھی ہو

یوں تک رہے ہیں آج انہیں بے کسی سے ہم

لے آئی بے خودی یہ ہمیں کس مقام پر

معلوم ہو رہے ہیں جہاں اجنبی سے ہم

جب تک نہ دے نجات غم زندگی ہمیں

لڑتے رہیں گے کشمکش زندگی سے ہم

اے بے وفا وفا کا ہماری نہ دے جواب

تجھ کو سمجھ رہے ہیں تری بے رخی سے ہم

حسرتؔ کو تو نے راہ محبت میں کھو دیا

باز آئے خضر راہ تری رہبری سے ہم