bezar phir na honge kabhi zindagi se hum

bezār phir na hoñge kabhī zindagī se ham

ho leñ tire qarīb jo ḳhush-qismatī se ham

ai kaash ham bhī hote kabhī itne ḳhush-nasīb

ġham bāñTte kisī kā to hañste kisī se ham

tum ne bulā liyā to chale aa.e bazm meñ

kab chāhte the qurb-e-harīfāñ ḳhushī se ham

anjām-e-tūr aaj bhī apnī nazar meñ hai

ġhash khā na jaa.eñ aap kī jalvagarī se ham

jī chāhtā hai rāz-e-dil-e-gil to kuchh khule

bulbul kī baat pūchh leñ jā kar kalī se ham

nāz-o-niyāz ishva-o-ġhammāziyāñ na siikh

ai husn kah rahe haiñ dil-e-āshiqī se ham

'shādāñ' kī hai sadā kī palaT aa.e inqalāb

aajiz nahīñ haiñ aaj bhī farmāñ-dahī se ham

bezar phir na honge kabhi zindagi se hum

ho len tere qarib jo KHush-qismati se hum

ai kash hum bhi hote kabhi itne KHush-nasib

gham banTte kisi ka to hanste kisi se hum

tum ne bula liya to chale aae bazm mein

kab chahte the qurb-e-harifan KHushi se hum

anjam-e-tur aaj bhi apni nazar mein hai

ghash kha na jaen aap ki jalwagari se hum

ji chahta hai raaz-e-dil-e-gil to kuchh khule

bulbul ki baat puchh len ja kar kali se hum

naz-o-niyaz ishwa-o-ghammaziyan na sikh

ai husn kah rahe hain dil-e-ashiqi se hum

'shadan' ki hai sada ki palaT aae inqalab

aajiz nahin hain aaj bhi farman-dahi se hum