bhati hain dil ko pyare naz-o-adaen teri

bhātī haiñ dil ko pyāre nāz-o-adā.eñ terī

dil meñ ye aarzū hai le luuñ balā.eñ terī

ik pal palak uThā kar dekho ba-nazr-e-rahmat

asrār-e-ganj-e-maḳhfī āñkheñ lubhā.eñ terī

zulf-e-siyah ke bal meñ aalam to mubtalā hai

āshiq bhalā ye kis ko bāteñ sunā.eñ terī

dīdār-e-haq-numā hai pyāre jamāl terā

mastāna jalva-gariyāñ kyā kyā batā.eñ terī

roz-e-azal se ham haiñ husn-o-liqā ke shā.eq

sharm-o-hayā kī bāteñ kyā kyā sunā.eñ terī

bas meñ nahīñ huuñ to hai phir kyā hijāb baaqī

kab tak bhalā ye ramzeñ dil meñ samā.eñ terī

ye ishq-soz mastī hai mīrāñ 'shāh' ko hāsil

kyā kyā ye hālateñ haiñ mujh ko sujhā.eñ terī

bhati hain dil ko pyare naz-o-adaen teri

dil mein ye aarzu hai le lun balaen teri

ek pal palak uTha kar dekho ba-nazr-e-rahmat

asrar-e-ganj-e-maKHfi aankhen lubhaen teri

zulf-e-siyah ke bal mein aalam to mubtala hai

aashiq bhala ye kis ko baaten sunaen teri

didar-e-haq-numa hai pyare jamal tera

mastana jalwa-gariyan kya kya bataen teri

roz-e-azal se hum hain husn-o-liqa ke shaeq

sharm-o-haya ki baaten kya kya sunaen teri

bas mein nahin hun to hai phir kya hijab baqi

kab tak bhala ye ramzen dil mein samaen teri

ye ishq-soz masti hai miran 'shah' ko hasil

kya kya ye haalaten hain mujh ko sujhaen teri