bhaDak jaane ki KHwahish kuchh to chingari mein rahti hai

bhaḌak jaane kī ḳhvāhish kuchh to chingārī meñ rahtī hai

havā bhī us ko shah dene kī tayyārī meñ rahtī hai

use mā'lūm hai bachche bigaḌ jaate haiñ shoḳhī meñ

magar maañ hai ki bachchoñ kī taraf-dārī meñ rahtī hai

raqam kartā hai jo insān tanhā.ī ke saa.e meñ

kahānī har kisī ke dil kī almārī meñ rahtī hai

vafā ke ma.anī-o-matlab se kal nā-āshnā thī jo

ab aisī qaum bhī dars-e-vafādārī meñ rahtī hai

phir us ke baa'd maslī jaatī hai pā-e-hiqārat se

kalī khilne se pahle tak hī phulvārī meñ rahtī hai

sitam Dhātā hai dhartī par samundar aur ye dhartī

hamesha us ko sah lene kī tayyārī meñ rahtī hai

ye kaisā vaqt aayā hai hamāre sāmne 'ashraf'

police bhī āj-kal choroñ kī sardārī meñ rahtī hai

bhaDak jaane ki KHwahish kuchh to chingari mein rahti hai

hawa bhi us ko shah dene ki tayyari mein rahti hai

use ma'lum hai bachche bigaD jate hain shoKHi mein

magar man hai ki bachchon ki taraf-dari mein rahti hai

raqam karta hai jo insan tanhai ke sae mein

kahani har kisi ke dil ki almari mein rahti hai

wafa ke mani-o-matlab se kal na-ashna thi jo

ab aisi qaum bhi dars-e-wafadari mein rahti hai

phir us ke ba'd masli jati hai pa-e-hiqarat se

kali khilne se pahle tak hi phulwari mein rahti hai

sitam Dhata hai dharti par samundar aur ye dharti

hamesha us ko sah lene ki tayyari mein rahti hai

ye kaisa waqt aaya hai hamare samne 'ashraf'

police bhi aaj-kal choron ki sardari mein rahti hai