bhala kya hain barkha ke mausam ke kahne

bhalā kyā haiñ barkhā ke mausam ke kahne

hasīnoñ ne pahne haiñ phūloñ ke gahne

na ho un hasīnoñ meñ kyoñ jāma-zebī

libās-e-mohabbat jinhoñ ne hoñ pahne

vafā rang laa.ī hai merī ki mujh ko

vo haiñ bevafā.ī ke dete ulahne

muqarrar thā milnā mirā un se lekin

muqaddar meñ the kuchh dinoñ ranj sahne

ajab haal thā dil kī betābiyoñ kā

na jab tak lage paas ham donoñ rahne

mile baa'd muddat to fart-e-ḳhushī se

lage chashm-e-pur-shauq se ashk bahne

na duniyā kī mujh ko ḳhabar hai na diiñ kī

mire dil pe jaadū kiyā hai birah ne

'jalīl' ab to vo shoḳh rahtā hai har-dam

kabhī mere baa.eñ kabhī mere dahne

bhala kya hain barkha ke mausam ke kahne

hasinon ne pahne hain phulon ke gahne

na ho un hasinon mein kyon jama-zebi

libas-e-mohabbat jinhon ne hon pahne

wafa rang lai hai meri ki mujh ko

wo hain bewafai ke dete ulahne

muqarrar tha milna mera un se lekin

muqaddar mein the kuchh dinon ranj sahne

ajab haal tha dil ki betabiyon ka

na jab tak lage pas hum donon rahne

mile ba'd muddat to fart-e-KHushi se

lage chashm-e-pur-shauq se ashk bahne

na duniya ki mujh ko KHabar hai na din ki

mere dil pe jadu kiya hai birah ne

'jalil' ab to wo shoKH rahta hai har-dam

kabhi mere baen kabhi mere dahne