bhala ye kaun hai mere hi andar mujhse ranjish mein

bhalā ye kaun hai mere hī andar mujh se ranjish meñ

vo mujh ko hī gañvā baiThā na jaane kis kī ḳhvāhish meñ

samundar ek Thahrā sā abhī tak hai tire andar

nadī ban kar mirā bahnā tujhe milne kī koshish meñ

darīche par khaḌe ho kar tujhe bas sochte rahnā

bahut se kaam baaqī hai bahut thoḌī sī bārish meñ

mirā vo ruuTh kar ronā tirā hañs ke chale jaanā

maiñ tujh ko bhuul na jā.ūñ tujhe paane kī sāzish meñ

kahīñ vo chiir kar terā hī siina bhaag nā nikle

use āzād kar do ab jo barsoñ se hai bandish meñ

bhala ye kaun hai mere hi andar mujh se ranjish mein

wo mujh ko hi ganwa baiTha na jaane kis ki KHwahish mein

samundar ek Thahra sa abhi tak hai tere andar

nadi ban kar mera bahna tujhe milne ki koshish mein

dariche par khaDe ho kar tujhe bas sochte rahna

bahut se kaam baqi hai bahut thoDi si barish mein

mera wo ruTh kar rona tera hans ke chale jaana

main tujh ko bhul na jaun tujhe pane ki sazish mein

kahin wo chir kar tera hi sina bhag na nikle

use aazad kar do ab jo barson se hai bandish mein