بھلے کشتی سے دریا مختلف ہے

بھلے کشتی سے دریا مختلف ہے

مگر کب ان کا رشتہ مختلف ہے

کہاں جائیں یہ آبادی کے مارے

کہ صحرا میں بھی اب کیا مختلف ہے

کہیں آ کر اکٹھا ہوں گے کیسے

جو سب کا سب سے رستہ مختلف ہے

سنواریں خود کو ہم آخر کہاں تک

ہر آئینے میں چہرہ مختلف ہے

کوئی کیسے سمجھ پائے گا ہم کو

نظر سے جب نظریہ مختلف ہے

تعجب ہے سمندر ہی میں رہ کر

سمندر سے جزیرہ مختلف ہے

جہاں سے دیکھتا تھا کوئی مجھ کو

ابھی بھی وہ دریچہ مختلف ہے

خدا نے انفرادیت وہ بخشی

ہے جو بھی ٹوٹا پھوٹا مختلف ہے