bhanwar mein mashware pani se leta hun

bhañvar meñ mashvare paanī se letā huuñ

maiñ har mushkil ko āsānī se letā huuñ

jahāñ dānā.ī detī hai koī mauqa.a

vahāñ maiñ kaam nādānī se letā huuñ

vo mansūbe haiñ kuchh ābād hone ke

maiñ jin par raa.e vīrānī se letā huuñ

ab apne ābloñ kī ghāTiyoñ se bhī

samundar dekh āsānī se letā huuñ

nahīñ letā magar lene pe aa.uuñ to

maiñ badla aag kā paanī se letā huuñ

nazar-andāz kar detī hai jab duniyā

janam ḳhud apnī hairānī se letā huuñ

jahāñ mushkil meñ paḌ jaate haiñ gird-o-pesh

vahāñ maiñ saañs āsānī se letā huuñ

lagātā hai mirī bīnā.ī par tohmat

maiñ fatve jis kī uryānī se letā huuñ

bhanwar mein mashware pani se leta hun

main har mushkil ko aasani se leta hun

jahan danai deti hai koi mauqa

wahan main kaam nadani se leta hun

wo mansube hain kuchh aabaad hone ke

main jin par rae virani se leta hun

ab apne aablon ki ghaTiyon se bhi

samundar dekh aasani se leta hun

nahin leta magar lene pe aaun to

main badla aag ka pani se leta hun

nazar-andaz kar deti hai jab duniya

janam KHud apni hairani se leta hun

jahan mushkil mein paD jate hain gird-o-pesh

wahan main sans aasani se leta hun

lagata hai meri binai par tohmat

main fatwe jis ki uryani se leta hun