bhar gae zaKHm to kya dard to ab bhi koi hai

bhar ga.e zaḳhm to kyā dard to ab bhī koī hai

aañkh rotī hai to rone kā sabab bhī koī hai

pī ga.ī ye mirī tanhā.ī mire dil kā lahū

qatra-e-ashk pe ye jashn-e-tarab bhī koī hai

maut se talḳh hai shāyad tirī rahmat kā azaab

jis ko kahte haiñ ġhazab aisā ġhazab bhī koī hai

roz gulshan meñ yahī pūchhtī phirtī hai sabā

tere phūloñ meñ mirā ġhuncha-e-lab bhī koī hai

us ke pahlū se bahut duur mire dil ke qarīb

aisā lagtā hai ki baiThā huā ab bhī koī hai

jo alāmat ho tire halqa-e-ushshāq ke biich

tujh se nisbat ke liye aisā laqab bhī koī hai

'shāhid' us silsila-e-ishq se vābasta huuñ

jis meñ ḳhud 'mīr' sā ik ālī-nasab bhī koī hai

bhar gae zaKHm to kya dard to ab bhi koi hai

aankh roti hai to rone ka sabab bhi koi hai

pi gai ye meri tanhai mere dil ka lahu

qatra-e-ashk pe ye jashn-e-tarab bhi koi hai

maut se talKH hai shayad teri rahmat ka azab

jis ko kahte hain ghazab aisa ghazab bhi koi hai

roz gulshan mein yahi puchhti phirti hai saba

tere phulon mein mera ghuncha-e-lab bhi koi hai

us ke pahlu se bahut dur mere dil ke qarib

aisa lagta hai ki baiTha hua ab bhi koi hai

jo alamat ho tere halqa-e-ushshaq ke bich

tujh se nisbat ke liye aisa laqab bhi koi hai

'shahid' us silsila-e-ishq se wabasta hun

jis mein KHud 'mir' sa ek aali-nasab bhi koi hai