bhare paDe hue sab bagh-o-ragh the us din

bhare paḌe hue sab bāġh-o-rāġh the us din

galī meñ phuul gharoñ meñ charāġh the us din

ye aur baat tire sāmne nahīñ aa.e

mire jilau meñ ka.ī bad-dimāġh the us din

uḌā liyā thā kisī ne ḳhumār āñkhoñ se

tahī sabāhat-e-gul se ayāġh the us din

shikasta-hāl paḌā thā maiñ apne bistar par

khule hue sabhī rañg-e-farāġh the us din

kahīñ libās badalte hue sitāre the

kahīñ lahakte hue ḳhāna-bāġh the us din

hameñ vo DhūñD na paayā thā rāt-bhar 'sājid'

ki ham usī kī tarah be-surāġh the us din

bhare paDe hue sab bagh-o-ragh the us din

gali mein phul gharon mein charagh the us din

ye aur baat tere samne nahin aae

mere jilau mein kai bad-dimagh the us din

uDa liya tha kisi ne KHumar aankhon se

tahi sabahat-e-gul se ayagh the us din

shikasta-haal paDa tha main apne bistar par

khule hue sabhi rang-e-faragh the us din

kahin libas badalte hue sitare the

kahin lahakte hue KHana-bagh the us din

hamein wo DhunD na paya tha raat-bhar 'sajid'

ki hum usi ki tarah be-suragh the us din