bhare safar mein ghaDi-bhar ka aashna na mila

bhare safar meñ ghaḌī-bhar kā āshnā na milā

shadīd pyaas meñ sahrā sarāb sā na milā

guzar ga.e to hazāroñ nishāñ the pahle se

palaT ke aa.e to apnā hī naqsh-e-pā na milā

kabhī jo dhuup to paikar pighal ga.e saare

koī bhī naqsh mujhe mere ḳhvāb sā na milā

ruke hue sabhī aañsū chhalak ga.e lekin

vo shaḳhs phir bhī nigāhoñ se boltā na milā

Thahar ga.ī thī mire paas chāñdnī ki use

tumhāre shahr meñ koī bhī jāgtā na milā

havā ke saath hī āvāz lauT aa.ī hai

ḳhalā meñ phirtī rahī koī ham-navā na milā

chalā to merī nazar meñ hazār rāheñ thiiñ

bhaTak gayā to mujhe ghar kā rāsta na milā

bhare safar mein ghaDi-bhar ka aashna na mila

shadid pyas mein sahra sarab sa na mila

guzar gae to hazaron nishan the pahle se

palaT ke aae to apna hi naqsh-e-pa na mila

kabhi jo dhup to paikar pighal gae sare

koi bhi naqsh mujhe mere KHwab sa na mila

ruke hue sabhi aansu chhalak gae lekin

wo shaKHs phir bhi nigahon se bolta na mila

Thahar gai thi mere pas chandni ki use

tumhaare shahr mein koi bhi jagta na mila

hawa ke sath hi aawaz lauT aai hai

KHala mein phirti rahi koi ham-nawa na mila

chala to meri nazar mein hazar rahen thin

bhaTak gaya to mujhe ghar ka rasta na mila