bhari aankhon se gar usko takun aamin kah dena

bharī āñkhoñ se gar us ko takūñ āmīn kah denā

barā.e bebasī gar chup rahūñ āmīn kah denā

ḳhudā har faisla terā mujhe manzūr hai lekin

agar mahv-e-duā vo naam luuñ āmīn kah denā

sambhalne kī koī sūrat mohabbat meñ nahīñ hotī

lihāzā laḌkhaḌā kar jab girūñ āmīn kah denā

usī ik naam par saarī ḳhudā.ī aa ke Thahrī hai

jab us ke saath naam apnā likhūñ āmīn kah denā

zamāna iltijā hai haath jab us ke uThe dekho

rahūñ maiñ tab talak yā nā rahūñ āmīn kah denā

masarrat muntazir rahtī ho us ke ḳhair-maqdam ko

zarā sā ḳhvāb hai bas jyuuñ ke tyuuñ āmīn kah denā

vazīfa jab paḌhūñ maiñ us ke haq meñ ai ḳhudā tū bhī

na rakhnā shart koī jab kahūñ āmīn kah denā

bhari aankhon se gar us ko takun aamin kah dena

barae bebasi gar chup rahun aamin kah dena

KHuda har faisla tera mujhe manzur hai lekin

agar mahw-e-dua wo nam lun aamin kah dena

sambhalne ki koi surat mohabbat mein nahin hoti

lihaza laDkhaDa kar jab girun aamin kah dena

usi ek nam par sari KHudai aa ke Thahri hai

jab us ke sath nam apna likhun aamin kah dena

zamana iltija hai hath jab us ke uThe dekho

rahun main tab talak ya na rahun aamin kah dena

masarrat muntazir rahti ho us ke KHair-maqdam ko

zara sa KHwab hai bas jyun ke tyun aamin kah dena

wazifa jab paDhun main us ke haq mein ai KHuda tu bhi

na rakhna shart koi jab kahun aamin kah dena