bhari mahfil mein ruswa kyon karen hum

bharī mahfil meñ rusvā kyoñ kareñ ham

tirī āñkhoñ ko dariyā kyoñ kareñ ham

zarūrī aur bhī haiñ mas.ale to

mohabbat hī kā charchā kyoñ kareñ ham

gile suljhā.eñge donoñ hī mil kar

bhalā sab ko ikaTThā kyoñ kareñ ham

siyāsat toḌ denā chāhtī hai

magar bhaa.ī se uljhā kyoñ kareñ ham

hamāre dil meñ hī rāvan hai yāroñ

zamāne bhar ko kosā kyoñ kareñ ham

tumhārī dostī kaafī nahīñ kyā

kisī dushman ko zinda kyoñ kareñ ham

nahīñ milte yahāñ insān 'parimal'

tirī duniyā meñ Thahrā kyoñ kareñ ham

bhari mahfil mein ruswa kyon karen hum

teri aankhon ko dariya kyon karen hum

zaruri aur bhi hain masale to

mohabbat hi ka charcha kyon karen hum

gile suljhaenge donon hi mil kar

bhala sab ko ikaTTha kyon karen hum

siyasat toD dena chahti hai

magar bhai se uljha kyon karen hum

hamare dil mein hi rawan hai yaron

zamane bhar ko kosa kyon karen hum

tumhaari dosti kafi nahin kya

kisi dushman ko zinda kyon karen hum

nahin milte yahan insan 'parimal'

teri duniya mein Thahra kyon karen hum