bharosa un ke wade par na ai dil ek zara karna

bharosa un ke va.ade par na ai dil ik zarā karnā

ki va.ada sahl hai mushkil hai va.ade kā vafā karnā

jo tum shikvoñ se Darte ho mujhī par ab jafā karnā

raqīboñ kī tarah mujh ko nahīñ aatā gila karnā

chaḌhī hai tevrī abrū pe bal hai haath meñ ḳhanjar

ye kyā naqsha hai kyā sāmān hai hai aaj kyā karnā

uThāo sar idhar dekho mileñ āñkheñ na sharmāo

ye ḳhalvat hai yahāñ kyā sharm mahfil meñ hayā karnā

tumheñ āsān hai begāna honā āshnā ho kar

hameñ dushvār hai nā-āshnā kā āshnā karnā

kahā jab sham.a-rū vo bole achchhī qadrdānī kī

hamārā kaam hai kyā rote rahnā yā jilā karnā

butoñ kī bandagī har-vaqt mujh par farz ai zāhid

tujhe kul pāñch vaqtoñ meñ namāzoñ kā adā karnā

nadāmat ranjish-e-be-vaj.h kī dekhī nahīñ jaatī

ab iqrār-e-ḳhatā karnā hai un se aur kyā karnā

hasīnoñ ko jahāñ zid aa.ī phir mushkil se milte haiñ

samajh kar ai dil-e-betāb arz-e-mudda.ā karnā

vo kahte haiñ vafā kī iltijā bhī bevafā.ī hai

savāl-e-rahm karnā bhī hai dar-parda gila karnā

hai apnā imtihāñ lenā unheñ aa.e jo turbat par

ḳhirām-e-nāz se maqsūd hai mahshar bapā karnā

abhī hai duur kī sāhab-salāmat guftugū kaisī

kuchh āsāñ hai kisī nā-āshnā kā āshnā karnā

raqīboñ kā liyā jab imtihāñ mujh se ye farmāyā

vafādār ek tū hai ḳhatm hai tujh par vafā karnā

ulajh paḌte haiñ aahoñ par bigaḌ jaate haiñ shevan par

vo kahte haiñ ye shor-e-hashr mahshar meñ bapā karnā

hue jaame se bāhar to nigāh-e-shauq khul khelī

mujhe ab farz Thahrā chheḌ kar tum ko ḳhafā karnā

kahā hai jis tarah maiñ ne qasam hai tujh ko ai qāsid

payām-e-shauq ko mere yūñhīñ jā kar adā karnā

sifārish jab kare koī to mere naam se nafrat

shikāyat kā jo daftar ho use pahroñ sunā karnā

'ḳhayāl' itnī shikāyat kyā butoñ kī be-niyāzī kī

rahā īmāñ salāmat chāhiye shukr-e-ḳhudā karnā

bharosa un ke wade par na ai dil ek zara karna

ki wada sahl hai mushkil hai wade ka wafa karna

jo tum shikwon se Darte ho mujhi par ab jafa karna

raqibon ki tarah mujh ko nahin aata gila karna

chaDhi hai tewri abru pe bal hai hath mein KHanjar

ye kya naqsha hai kya saman hai hai aaj kya karna

uThao sar idhar dekho milen aankhen na sharmao

ye KHalwat hai yahan kya sharm mahfil mein haya karna

tumhein aasan hai begana hona aashna ho kar

hamein dushwar hai na-ashna ka aashna karna

kaha jab shama-ru wo bole achchhi qadrdani ki

hamara kaam hai kya rote rahna ya jila karna

buton ki bandagi har-waqt mujh par farz ai zahid

tujhe kul panch waqton mein namazon ka ada karna

nadamat ranjish-e-be-wajh ki dekhi nahin jati

ab iqrar-e-KHata karna hai un se aur kya karna

hasinon ko jahan zid aai phir mushkil se milte hain

samajh kar ai dil-e-betab arz-e-muddaa karna

wo kahte hain wafa ki iltija bhi bewafai hai

sawal-e-rahm karna bhi hai dar-parda gila karna

hai apna imtihan lena unhen aae jo turbat par

KHiram-e-naz se maqsud hai mahshar bapa karna

abhi hai dur ki sahab-salamat guftugu kaisi

kuchh aasan hai kisi na-ashna ka aashna karna

raqibon ka liya jab imtihan mujh se ye farmaya

wafadar ek tu hai KHatm hai tujh par wafa karna

ulajh paDte hain aahon par bigaD jate hain shewan par

wo kahte hain ye shor-e-hashr mahshar mein bapa karna

hue jame se bahar to nigah-e-shauq khul kheli

mujhe ab farz Thahra chheD kar tum ko KHafa karna

kaha hai jis tarah main ne qasam hai tujh ko ai qasid

payam-e-shauq ko mere yunhin ja kar ada karna

sifarish jab kare koi to mere nam se nafrat

shikayat ka jo daftar ho use pahron suna karna

'KHayal' itni shikayat kya buton ki be-niyazi ki

raha iman salamat chahiye shukr-e-KHuda karna