bharpur mohabbat ka elan mukammal hai

bharpūr mohabbat kā elaan mukammal hai

us nīm-nigāhī kā farmān mukammal hai

yā dushman-e-jāñ mujh par sach-much hai karam-farmā

yā merī tabāhī kā sāmān mukammal hai

kis chaav se ik bastī jo ham ne basā.ī thī

dekhā thā vahī bastī vīrān mukammal hai

zaḳhmoñ pe mire tū ne jis tarah namak chhiḌkā

is niim ināyat kā ehsān mukammal hai

har moḌ pe miltā hai allāh kā vo banda

qālib meñ jo insāñ ke shaitān mukammal hai

ai 'sāz' mire dil meñ ab jaan nahīñ baaqī

go ḳhuun kā rag rag meñ daurān mukammal hai

bharpur mohabbat ka elan mukammal hai

us nim-nigahi ka farman mukammal hai

ya dushman-e-jaan mujh par sach-much hai karam-farma

ya meri tabahi ka saman mukammal hai

kis chaw se ek basti jo hum ne basai thi

dekha tha wahi basti viran mukammal hai

zaKHmon pe mere tu ne jis tarah namak chhiDka

is nim inayat ka ehsan mukammal hai

har moD pe milta hai allah ka wo banda

qalib mein jo insan ke shaitan mukammal hai

ai 'saz' mere dil mein ab jaan nahin baqi

go KHun ka rag rag mein dauran mukammal hai