بھٹک گیا تھا ہمارا جو کارواں نہ ملا

بھٹک گیا تھا ہمارا جو کارواں نہ ملا

کہاں کہاں اسے ڈھونڈا کوئی نشاں نہ ملا

جبین شوق تھی بے چین سجدہ کرنے کو

جبین شوق کو تیرا ہی آستاں نہ ملا

فریب و جور و ستم تیرے سہہ لیے ہنس کر

جہان عشق کو ہم سا بھی بے زباں نہ ملا

یہ چاند پھول ستارے نسیم‌ صبح بہار

تجھے ہی دیکھا مناظر میں تو کہاں نہ ملا

تمہارے شہر میں سب کچھ ملا وفا کے سوا

ہزار ڈھونڈا کوئی یار مہرباں نہ ملا

ہجوم درد و الم میں ہی مبتلا پایا

بچھڑ کے آپ سے کوئی بھی شادماں نہ ملا

بھری بہار میں شبنمؔ خزاں کا عالم ہے

کہ خار زار ملا ہم کو گلستاں نہ ملا