bhaTak gaya tha hamara jo karwan na mila

bhaTak gayā thā hamārā jo kārvāñ na milā

kahāñ kahāñ use DhūñDā koī nishāñ na milā

jabīn-e-shauq thī bechain sajda karne ko

jabīn-e-shauq ko terā hī āstāñ na milā

fareb-o-jaur-o-sitam tere sah liye hañs kar

jahān-e-ishq ko ham sā bhī be-zabāñ na milā

ye chāñd phuul sitāre nasīm-e-sub.h-e-bahār

tujhe hī dekhā manāzir meñ tū kahāñ na milā

tumhāre shahr meñ sab kuchh milā vafā ke sivā

hazār DhūñDā koī yaar mehrbāñ na milā

hujūm-e-dard-o-alam meñ hī mubtalā paayā

bichhaḌ ke aap se koī bhī shādmāñ na milā

bharī bahār meñ 'shabnam' ḳhizāñ kā aalam hai

ki ḳhār-zār milā ham ko gulsitāñ na milā

bhaTak gaya tha hamara jo karwan na mila

kahan kahan use DhunDa koi nishan na mila

jabin-e-shauq thi bechain sajda karne ko

jabin-e-shauq ko tera hi aastan na mila

fareb-o-jaur-o-sitam tere sah liye hans kar

jahan-e-ishq ko hum sa bhi be-zaban na mila

ye chand phul sitare nasim-e-subh-e-bahaar

tujhe hi dekha manazir mein tu kahan na mila

tumhaare shahr mein sab kuchh mila wafa ke siwa

hazar DhunDa koi yar mehrban na mila

hujum-e-dard-o-alam mein hi mubtala paya

bichhaD ke aap se koi bhi shadman na mila

bhari bahaar mein 'shabnam' KHizan ka aalam hai

ki KHar-zar mila hum ko gulsitan na mila