bhaTak jaega dil ayyari-e-idrak se niklen

bhaTak jā.egā dil ayyārī-e-idrāk se nikleñ

ye zanjīr-e-girāñ toḌeñ ham is pechāk se nikleñ

na maut aa.e jise aisā koī kirdār ho apnā

kahānī ban ke aisī dīda-e-namnāk se nikleñ

yahī parcham nishān-e-lashkar-e-bātil na ban jaa.e

ham ik ḳhanjar sahī lekin kaf-e-saffāk se nikleñ

sabā ban kar abhī karne haiñ tai kitne safar ham ko

ham is miTTī kī ḳhushbū haiñ tilism-e-chāk se nikleñ

hamārī ham-rahī tak haiñ sitāre hoñ ki gul-būTe

zamīñ par ye ugeñ yā parda-e-aflāk se nikleñ

sar-e-sahrā abhī raqs-e-ġhubār-e-qais baaqī hai

abhī kuchh aur lailā.eñ harīm-e-ḳhāk se nikleñ

janāb-e-'ramz' be-masraf rifāqat kā junūñ kab tak

savād-e-gul meñ aap aa.eñ ḳhas-o-ḳhāshāk se nikleñ

bhaTak jaega dil ayyari-e-idrak se niklen

ye zanjir-e-giran toDen hum is pechaak se niklen

na maut aae jise aisa koi kirdar ho apna

kahani ban ke aisi dida-e-namnak se niklen

yahi parcham nishan-e-lashkar-e-baatil na ban jae

hum ek KHanjar sahi lekin kaf-e-saffak se niklen

saba ban kar abhi karne hain tai kitne safar hum ko

hum is miTTi ki KHushbu hain tilism-e-chaak se niklen

hamari ham-rahi tak hain sitare hon ki gul-buTe

zamin par ye ugen ya parda-e-aflak se niklen

sar-e-sahra abhi raqs-e-ghubar-e-qais baqi hai

abhi kuchh aur lailaen harim-e-KHak se niklen

janab-e-'ramz' be-masraf rifaqat ka junun kab tak

sawad-e-gul mein aap aaen KHas-o-KHashak se niklen