bhaTak ke rah se hum sab ko aazma aae

bhaTak ke raah se ham sab ko aazmā aa.e

fareb de ga.e jitne bhī rahnumā aa.e

ham un ko haal dil-e-zār bhī sunā aa.e

Kamala-e-jur.at-e-iz.hār bhī dikhā aa.e

kareñ to kis se kareñ zikr-e-ḳhānā-vīrānī

ki ham to aag nasheman ko ḳhud lagā aa.e

ḳhayāl-e-vasl meñ rahte haiñ raat bhar bedār

tumhāre hijr ke māroñ ko niiñd kyā aa.e

rahīn-e-aish-o-tarab haiñ jo roz o shab un ko

pasand kaise mire ġham kā mājrā aa.e

kabhī hameñ bhī mayassar ho rūThnā un se

kabhī hamāre bhī dil meñ ye hausla aa.e

har ik se pūchhte haiñ haal kirshn 'mohan' kā

jise adā-e-sitam se vo ḳhud miTā aa.e

bhaTak ke rah se hum sab ko aazma aae

fareb de gae jitne bhi rahnuma aae

hum un ko haal dil-e-zar bhi suna aae

Kamala-e-jurat-e-izhaar bhi dikha aae

karen to kis se karen zikr-e-KHana-virani

ki hum to aag nasheman ko KHud laga aae

KHayal-e-wasl mein rahte hain raat bhar bedar

tumhaare hijr ke maron ko nind kya aae

rahin-e-aish-o-tarab hain jo roz o shab un ko

pasand kaise mere gham ka majra aae

kabhi hamein bhi mayassar ho ruThna un se

kabhi hamare bhi dil mein ye hausla aae

har ek se puchhte hain haal kirshn 'mohan' ka

jise ada-e-sitam se wo KHud miTa aae