bhaTak na jae KHudaya nazar kitabon mein

bhaTak na jaa.e ḳhudāyā nazar kitāboñ meñ

guzarte haiñ mire shām-o-sahar kitāboñ meñ

jahān bhar meñ haiñ jāzib hazār-hā chīzeñ

magar nazar ne banāyā hai ghar kitāboñ meñ

hazār haif hamīñ bahara-yāb ho na sake

kahāñ kahāñ kā thā ilm-o-hunar kitāboñ meñ

vo ilm-e-zāt ki jis kī hameñ ḳhabar na huī

vo ilm-e-zāt bhī thā jalva-gar kitāboñ meñ

hamāre qaul-o-amal par huā na koī asar

ulajh ke rah ga.ī apnī nazar kitāboñ meñ

jahāñ bhī sang-e-havādis kī ho ga.ī bārish

chhupā liyā hai vahīñ apnā sar kitāboñ meñ

mutāla kī numā.ish hī jin kā maqsad thā

milā na kuchh bhī unheñ umr bhar kitāboñ meñ

talāsh jin kī har ik ilm-dāñ ko rahtī hai

vo durr-e-ilm bhī haiñ mo'atabar kitāboñ meñ

yahīñ huiiñ mirī hastī kī ibtidā-e-safar

ho ḳhūb-tar jo ho ḳhatm-e-safar kitāboñ meñ

zamāne bhar kī ḳhabar mil ga.ī kitāboñ se

milī na apnī zarā bhī ḳhabar kitāboñ meñ

huī hai jis se mirī fikr-e-gauharīñ 'maġhmūm

mujhe milī hai vo tāb-e-guhar kitāboñ meñ

bhaTak na jae KHudaya nazar kitabon mein

guzarte hain mere sham-o-sahar kitabon mein

jahan bhar mein hain jazib hazar-ha chizen

magar nazar ne banaya hai ghar kitabon mein

hazar haif hamin bahara-yab ho na sake

kahan kahan ka tha ilm-o-hunar kitabon mein

wo ilm-e-zat ki jis ki hamein KHabar na hui

wo ilm-e-zat bhi tha jalwa-gar kitabon mein

hamare qaul-o-amal par hua na koi asar

ulajh ke rah gai apni nazar kitabon mein

jahan bhi sang-e-hawadis ki ho gai barish

chhupa liya hai wahin apna sar kitabon mein

mutala ki numaish hi jin ka maqsad tha

mila na kuchh bhi unhen umr bhar kitabon mein

talash jin ki har ek ilm-dan ko rahti hai

wo durr-e-ilm bhi hain mo'atabar kitabon mein

yahin huin meri hasti ki ibtida-e-safar

ho KHub-tar jo ho KHatm-e-safar kitabon mein

zamane bhar ki KHabar mil gai kitabon se

mili na apni zara bhi KHabar kitabon mein

hui hai jis se meri fikr-e-gauharin 'maghmum

mujhe mili hai wo tab-e-guhar kitabon mein