بھٹک نہ جاؤں کہیں سیل تیرگی سے بچا

بھٹک نہ جاؤں کہیں سیل تیرگی سے بچا

مجھے پرائے چراغوں کی روشنی سے بچا

ہر اک زبان پہ تازہ لہو کا ذائقہ ہے

درندگی سے ہراساں ہوں آدمی سے بچا

ہر ایک سائے کو اپنا وجود کھونا تھا

وہ رزق دھوپ کا ٹھہرا جو چاندنی سے بچا

کسی نے پھول عجب زاویے سے مارا تھا

میں بال بال عذاب شکستگی سے بچا

جنوں کو میری ہلاکت کا اختیار نہیں

بچا سکے تو مجھے میری آگہی سے بچا

صدف کا ظرف عطا کر کہ بوند ہو کافی

کہیں جو بجھ نہ سکے ایسی تشنگی سے بچا

شریفؔ کو جو ترے غم سے بے نیاز کرے

مرے خدا مجھے ایسی بری گھڑی سے بچا