bhaTak na jaun kahin sail-e-tirgi se bacha

bhaTak na jā.ūñ kahīñ sail-e-tīrgī se bachā

mujhe parā.e charāġhoñ kī raushnī se bachā

har ik zabān pe taaza lahū kā zā.iqa hai

darindagī se hirāsāñ huuñ aadmī se bachā

har ek saa.e ko apnā vajūd khonā thā

vo rizq dhuup kā Thahrā jo chāñdnī se bachā

kisī ne phuul ajab zāviye se maarā thā

maiñ baal baal azāb-e-shikastagī se bachā

junūñ ko merī halākat kā iḳhtiyār nahīñ

bachā sake to mujhe merī āgahī se bachā

sadaf kā zarf atā kar ki buuñd ho kaafī

kahīñ jo bujh na sake aisī tishnagī se bachā

'sharīf' ko jo tire ġham se be-niyāz kare

mire ḳhudā mujhe aisī burī ghaḌī se bachā

bhaTak na jaun kahin sail-e-tirgi se bacha

mujhe parae charaghon ki raushni se bacha

har ek zaban pe taza lahu ka zaiqa hai

darindagi se hirasan hun aadmi se bacha

har ek sae ko apna wajud khona tha

wo rizq dhup ka Thahra jo chandni se bacha

kisi ne phul ajab zawiye se mara tha

main baal baal azab-e-shikastagi se bacha

junun ko meri halakat ka iKHtiyar nahin

bacha sake to mujhe meri aagahi se bacha

sadaf ka zarf ata kar ki bund ho kafi

kahin jo bujh na sake aisi tishnagi se bacha

'sharif' ko jo tere gham se be-niyaz kare

mere KHuda mujhe aisi buri ghaDi se bacha