bhaTak raha hun KHalaon mein gum-shuda ki tarah

bhaTak rahā huuñ ḳhalāoñ meñ gum-shuda kī tarah

sukūt-e-sang ne Thukrā diyā sadā kī tarah

mire vajūd ko pighlā rahī hai barf kī aañch

magar vo chup sī lagī hai mujhe ḳhudā kī tarah

ajiib shahr hai parchhā.iyāñ chamaktī haiñ

har ajnabī mujhe lagtā hai āshnā kī tarah

chalā thā ghar se nikal kar pahāḌ kī jānib

palaT ke aa gayā bastī meñ phir sadā kī tarah

dharī rahegī ye ḳhushbū kī khokhlī zanjīr

har ek rang se uḌ jā.ūñgā havā kī tarah

girī thī os jo kal shab badan ke sahrā meñ

ye baat phail ga.ī shahr meñ vabā kī tarah

hameñ havāoñ kī Thokar bhī raas aa na sakī

paḌe haiñ vaqt ke raste meñ naqsh-e-pā kī tarah

bhaTak raha hun KHalaon mein gum-shuda ki tarah

sukut-e-sang ne Thukra diya sada ki tarah

mere wajud ko pighla rahi hai barf ki aanch

magar wo chup si lagi hai mujhe KHuda ki tarah

ajib shahr hai parchhaiyan chamakti hain

har ajnabi mujhe lagta hai aashna ki tarah

chala tha ghar se nikal kar pahaD ki jaanib

palaT ke aa gaya basti mein phir sada ki tarah

dhari rahegi ye KHushbu ki khokhli zanjir

har ek rang se uD jaunga hawa ki tarah

giri thi os jo kal shab badan ke sahra mein

ye baat phail gai shahr mein waba ki tarah

hamein hawaon ki Thokar bhi ras aa na saki

paDe hain waqt ke raste mein naqsh-e-pa ki tarah