bhaTak rahi hai nazaron mein har nazar tanha

bhaTak rahī hai nazāroñ meñ har nazar tanhā

paḌā hai jalva-gah-e-dil meñ jalva-gar tanhā

ġham-e-hayāt hī Thahrā thā ġham-gusār-e-hayāt

sharīk-e-rāh rahī gard-e-rahguzar tanhā

sunā.eñ qissa-e-āshob-e-dard-e-tanhā.ī

kabhī jo tum se mulāqāt ho magar tanhā

hazār dīda-varoñ ke charāġh-e-dīda-varī

bujhā ga.ī nigah-e-shaḳhs-e-kam-nazar tanhā

na pursish-e-ġham-e-daurāñ na shirkat-e-ġham-e-dil

milā hujūm-e-bashar meñ bhī har bashar tanhā

ab apne saath hujūm-e-ġham-e-zamāna hai

chale the jab to ġham-e-dil thā ham-safar tanhā

kisī meñ tāqat-e-parvāz ho to dekh sake

kahāñ paḌā hai 'shamīm'-e-shikasta-par tanhā

bhaTak rahi hai nazaron mein har nazar tanha

paDa hai jalwa-gah-e-dil mein jalwa-gar tanha

gham-e-hayat hi Thahra tha gham-gusar-e-hayat

sharik-e-rah rahi gard-e-rahguzar tanha

sunaen qissa-e-ashob-e-dard-e-tanhai

kabhi jo tum se mulaqat ho magar tanha

hazar dida-waron ke charagh-e-dida-wari

bujha gai nigah-e-shaKHs-e-kam-nazar tanha

na pursish-e-gham-e-dauran na shirkat-e-gham-e-dil

mila hujum-e-bashar mein bhi har bashar tanha

ab apne sath hujum-e-gham-e-zamana hai

chale the jab to gham-e-dil tha ham-safar tanha

kisi mein taqat-e-parwaz ho to dekh sake

kahan paDa hai 'shamim'-e-shikasta-par tanha