بھٹک رہی ہے نظاروں میں ہر نظر تنہا

بھٹک رہی ہے نظاروں میں ہر نظر تنہا

پڑا ہے جلوہ گہ دل میں جلوہ گر تنہا

غم حیات ہی ٹھہرا تھا غم گسار حیات

شریک راہ رہی گرد رہ گزر تنہا

سنائیں قصۂ آشوب درد تنہائی

کبھی جو تم سے ملاقات ہو مگر تنہا

ہزار دیدہ وروں کے چراغ دیدہ وری

بجھا گئی نگہ شخص کم نظر تنہا

نہ پرسش غم دوراں نہ شرکت غم دل

ملا ہجوم بشر میں بھی ہر بشر تنہا

اب اپنے ساتھ ہجوم غم زمانہ ہے

چلے تھے جب تو غم دل تھا ہم سفر تنہا

کسی میں طاقت پرواز ہو تو دیکھ سکے

کہاں پڑا ہے شمیمؔ شکستہ پر تنہا