bhaTak rahi hai ruh ke andar lazzat sukhi gili si

bhaTak rahī hai ruuh ke andar lazzat sūkhī giilī sī

jaise rasta bhuul ga.ī ho ek nadī pathrīlī sī

mere us ke biich kā rishta ik majbūr zarūrat hai

maiñ sūkhe jazboñ kā īñdhan vo māchis kī tiilī sī

dekhūñ kaisī fasl ugātā hai mausam tanhā.ī kā

dard ke biij kī nasl hai ūñchī dil kī miTTī giilī sī

darvāze par muñh laTkā.e qillat rañg-o-roġhan kī

āñgan āñgan jashn manā.e ḳhvāhish niilī piilī sī

mujh ko baañT ke rakh detī hai dhuup chhāñv ke ḳhemoñ meñ

kuchh be-ġhairat sī masrūfī kuchh fursat sharmīlī sī

din bhar kī jāñ-soz thakan kā ajr chukāne ko 'ḳhurshīd'

shaam ke parbat par baiThī hai ik saa.at nokīlī sī

bhaTak rahi hai ruh ke andar lazzat sukhi gili si

jaise rasta bhul gai ho ek nadi pathrili si

mere us ke bich ka rishta ek majbur zarurat hai

main sukhe jazbon ka indhan wo machis ki tili si

dekhun kaisi fasl ugata hai mausam tanhai ka

dard ke bij ki nasl hai unchi dil ki miTTi gili si

darwaze par munh laTkae qillat rang-o-roghan ki

aangan aangan jashn manae KHwahish nili pili si

mujh ko banT ke rakh deti hai dhup chhanw ke KHemon mein

kuchh be-ghairat si masrufi kuchh fursat sharmili si

din bhar ki jaan-soz thakan ka ajr chukane ko 'KHurshid'

sham ke parbat par baiThi hai ek saat nokili si