bhaTki hai ujalon mein nazar sham se pahle

bhaTkī hai ujāloñ meñ nazar shaam se pahle

ye shaam Dhale kā sā asar shaam se pahle

sakte meñ sisakte hue tābūt khuleñge

achchhā hai nikal jaa.e ye Dar shaam se pahle

vo razmiya paḌhte haiñ vo uksāte haiñ mujh ko

jaatī huī kirnoñ ke bhañvar shaam se pahle

maiñ Tiile pe baiThā to sunī shahr kī siskī

dekhe mire āñgan mire ghar shaam se pahle

ai sub.h ke taare kī ziyā os kī ThanDak

ik roz mirī chhat pe utar shaam se pahle

is baar shab-e-chār-dahum kuchh to parakhnā

phir kaaT na denā mire par shaam se pahle

vo qumqume bāzār ke mujh se haiñ shanāsā

us samt bhī jaatā huuñ magar shaam se pahle

maiñ dard ke qasbe meñ bahut der se pahuñchā

bik jaate haiñ sab taaza samar shaam se pahle

bhaTki hai ujalon mein nazar sham se pahle

ye sham Dhale ka sa asar sham se pahle

sakte mein sisakte hue tabut khulenge

achchha hai nikal jae ye Dar sham se pahle

wo razmiya paDhte hain wo uksate hain mujh ko

jati hui kirnon ke bhanwar sham se pahle

main Tile pe baiTha to suni shahr ki siski

dekhe mere aangan mere ghar sham se pahle

ai subh ke tare ki ziya os ki ThanDak

ek roz meri chhat pe utar sham se pahle

is bar shab-e-chaar-dahum kuchh to parakhna

phir kaT na dena mere par sham se pahle

wo qumqume bazar ke mujh se hain shanasa

us samt bhi jata hun magar sham se pahle

main dard ke qasbe mein bahut der se pahuncha

bik jate hain sab taza samar sham se pahle