بھیڑ تھی لیکن بنام دوستاں کئی نہیں تھا

بھیڑ تھی لیکن بنام دوستاں کئی نہیں تھا

مہرباں سچ کہہ رہا ہوں مہرباں کوئی نہیں تھا

آج میں جس قریۂ سر سبز کے اوپر کھڑا ہوں

ابتدا میں اس کے سر پر آسماں کوئی نہیں تھا

میرے حصے ہی میں لکھا تھا سماعت کو ترسنا

ورنہ اطراف و جوانب بے زباں کوئی نہیں تھا

صبح کیسے کی ہے فرصت سے بتاؤں گا کسی دن

ہاں یقیں جانو شب رفتہ یہاں کوئی نہیں تھا

دوڑتا پھرتا تھا کیا رگ رگ میں میری آگ سا پھر

فصد کھلوائی تو خوں جیسا نشاں کوئی نہیں تھا

سخت حیرت ہے کہ کس رنج مسلسل میں رہا میں

کار و بار زیست میں سود و زیاں کئی نہیں تھا