bhiD thi lekin banam-e-dostan koi nahin tha

bhiiḌ thī lekin banām-e-dostāñ koī nahīñ thā

mehrbāñ sach kah rahā huuñ mehrbāñ koī nahīñ thā

aaj maiñ jis qarya-e-sar-sabz ke uupar khaḌā huuñ

ibtidā meñ us ke sar par āsmāñ koī nahīñ thā

mere hisse hī meñ likkhā thā samā'at ko tarasnā

varna atrāf-o-javānib be-zabāñ koī nahīñ thā

sub.h kaise kī hai fursat se batā.ūñgā kisī din

haañ yaqīñ jaano shab-e-rafta yahāñ koī nahīñ thā

dauḌtā phirtā thā kyā rag rag meñ merī aag sā phir

fasd khulvā.ī to ḳhuuñ jaisā nishāñ koī nahīñ thā

saḳht hairat hai ki kis ranj-e-musalsal meñ rahā maiñ

kār-o-bār-e-zīst meñ sūd-o-ziyāñ koī nahīñ thā

bhiD thi lekin banam-e-dostan koi nahin tha

mehrban sach kah raha hun mehrban koi nahin tha

aaj main jis qarya-e-sar-sabz ke upar khaDa hun

ibtida mein us ke sar par aasman koi nahin tha

mere hisse hi mein likkha tha sama'at ko tarasna

warna atraf-o-jawanib be-zaban koi nahin tha

subh kaise ki hai fursat se bataunga kisi din

han yaqin jaano shab-e-rafta yahan koi nahin tha

dauDta phirta tha kya rag rag mein meri aag sa phir

fasd khulwai to KHun jaisa nishan koi nahin tha

saKHt hairat hai ki kis ranj-e-musalsal mein raha main

kar-o-bar-e-zist mein sud-o-ziyan koi nahin tha