bhigi bhigi ghaTaen uThin dhimi dhimi phuwaren aain

bhīgī bhīgī ghaTā.eñ uThīñ dhīmī dhīmī phuvāreñ aa.iiñ

rafta rafta tamanna jaagī chupke chupke bahāreñ aa.iiñ

zikr-o-fikr meñ kuchh din jhūle hosh nahīñ ab haiñ vo jhakole

aage rim-jhim rim-jhim būñdeñ aur pīchhe bauchhāreñ aa.iiñ

ālam-e-shauq se un kā qaidī tauq-o-salāsil pahne aayā

kāñpe arsh ke paa.e jab zanjīroñ kī jhankāreñ aa.iiñ

muddat se sailāb bane vo buniyādoñ ko khod rahe the

TūTne par ab dair-e-ḳhudī kī pathrīlī dīvāreñ aa.iiñ

donoñ jahāñ kī saarī pūñjī baar huī hai jin nāqoñ par

mard-e-gadā ke haath meñ kyūñkar un nāqoñ kī mahāreñ aa.iiñ

tere faqīr ko rasta chalte izzat-o-zillat meñ uljhāne

mandir se pūjā.eñ dauḌīñ masjid se phaTkāreñ aa.iiñ

gosh-e-arsh kā bosa lene dahr se uTh kar baarī baarī

kāfir kī fariyādeñ aa.iiñ ġhāzī kī lālkāreñ aa.iiñ

us kī apnī fitrat jiitī mere gunāh pe rahmat barsī

jaise maañ kī chhātī umDī jaise duudh kī dhāreñ aa.iiñ

bhigi bhigi ghaTaen uThin dhimi dhimi phuwaren aain

rafta rafta tamanna jagi chupke chupke bahaaren aain

zikr-o-fikr mein kuchh din jhule hosh nahin ab hain wo jhakole

aage rim-jhim rim-jhim bunden aur pichhe bauchhaaren aain

aalam-e-shauq se un ka qaidi tauq-o-salasil pahne aaya

kanpe arsh ke pae jab zanjiron ki jhankaren aain

muddat se sailab bane wo buniyaadon ko khod rahe the

TuTne par ab dair-e-KHudi ki pathrili diwaren aain

donon jahan ki sari punji bar hui hai jin naqon par

mard-e-gada ke hath mein kyunkar un naqon ki mahaaren aain

tere faqir ko rasta chalte izzat-o-zillat mein uljhane

mandir se pujaen dauDin masjid se phaTkaren aain

gosh-e-arsh ka bosa lene dahr se uTh kar bari bari

kafir ki fariyaaden aain ghazi ki lalkaren aain

us ki apni fitrat jiti mere gunah pe rahmat barsi

jaise man ki chhati umDi jaise dudh ki dhaaren aain