bhik lene aish ki sab dar-ba-dar jate rahe

bhiik lene aish kī sab dar-ba-dar jaate rahe

mere jaise manchale ḳhushiyoñ ko Thukrāte rahe

kitnī ibrat-nāk thī ahbāb kī vo guftugū

dushmanoñ ke tanz jab hasrat se yaad aate rahe

zindagī kā jā.eza lete rahe ham duur se

zindagī kā sāmnā karne se katrāte rahe

umr bhar saa.il bane phirte rahe ham dar-ba-dar

umr bhar dāman savālī ban ke phailāte rahe

dostoñ ne rafta rafta mujh se āñkheñ pher liiñ

aur patthar mere ghar meñ muddatoñ aate rahe

fikr se nā-āshnā dām-e-rivāyat ke asiir

kitne shā.ir ek afsāne ko dohrāte rahe

jab bhī ghar vāpas hue zaḳhmoñ se ho kar chuur chuur

raah meñ koī na koī āshnā paate rahe

ab to mustaqbil karegā is kā 'āzar' faisla

bhiik ham māñgā kiye yā bhiik ham paate rahe

bhik lene aish ki sab dar-ba-dar jate rahe

mere jaise manchale KHushiyon ko Thukraate rahe

kitni ibrat-nak thi ahbab ki wo guftugu

dushmanon ke tanz jab hasrat se yaad aate rahe

zindagi ka jaeza lete rahe hum dur se

zindagi ka samna karne se katraate rahe

umr bhar sail bane phirte rahe hum dar-ba-dar

umr bhar daman sawali ban ke phailate rahe

doston ne rafta rafta mujh se aankhen pher lin

aur patthar mere ghar mein muddaton aate rahe

fikr se na-ashna dam-e-riwayat ke asir

kitne shair ek afsane ko dohraate rahe

jab bhi ghar wapas hue zaKHmon se ho kar chur chur

rah mein koi na koi aashna pate rahe

ab to mustaqbil karega is ka 'azar' faisla

bhik hum manga kiye ya bhik hum pate rahe