bhikshu se KHwahishat ka ban mangti rahi

bhikshū se ḳhvāhishāt kā ban māñgtī rahī

kashkol-e-tan meñ 'umr tapan māñgtī rahī

sargoshiyāñ sunī thiiñ dar-o-bām ne yahāñ

ḳhālī thī chārpā.ī badan māñgtī rahī

vo laash apnī chhoḌ ke bhāgā na jaane kyuuñ

us kī barahna laash kafan māñgtī rahī

le kar charāġh raat ko phirtī thī ḳhāmushī

ganjīna-e-hurūf-e-suḳhan māñgtī rahī

dekhā jo is ne ham ko farāġhat se yaañ kabhī

qismat hamārī ranj-o-mehan māñgtī rahī

ghaḌiyāñ Duboīñ kis ne sar-e-shām phir yahāñ

do pal sukūn ke jo thakan māñgtī rahī

kis kā na jaane lams samāyā lihāf meñ

rah rah ke raat mujh se badan māñgtī rahī

ham ne sarāb dekhe hazāroñ sarāb meñ

ik guuna tishnagī thī jo tan māñgtī rahī

ḳhushbū-libās shaḳhs vo guzrā yahāñ se thā

sahrā kī ret mujh se chaman māñgtī rahī

sarmā kī sard tīra-o-tārīk raat ḳhud

rah rah ke dar pe aag phiran māñgtī rahī

ḳhud tīrgī se sahmī huī shab tamām shab

dast-e-du'ā uThā.e kiran māñgtī rahī

pāras manī thī naag ke muñh meñ chhupī huī

nāgin lipaT lipaT ke vo phan māñgtī rahī

duniyā ne ham ko jaur-o-jafā de diye 'ayāz'

is daad ke 'evaz meñ ye fan māñgtī rahī

bhikshu se KHwahishat ka ban mangti rahi

kashkol-e-tan mein 'umr tapan mangti rahi

sargoshiyan suni thin dar-o-baam ne yahan

KHali thi chaarpai badan mangti rahi

wo lash apni chhoD ke bhaga na jaane kyun

us ki barahna lash kafan mangti rahi

le kar charagh raat ko phirti thi KHamushi

ganjina-e-huruf-e-suKHan mangti rahi

dekha jo is ne hum ko faraghat se yan kabhi

qismat hamari ranj-o-mehan mangti rahi

ghaDiyan Duboin kis ne sar-e-sham phir yahan

do pal sukun ke jo thakan mangti rahi

kis ka na jaane lams samaya lihaf mein

rah rah ke raat mujh se badan mangti rahi

hum ne sarab dekhe hazaron sarab mein

ek guna tishnagi thi jo tan mangti rahi

KHushbu-libas shaKHs wo guzra yahan se tha

sahra ki ret mujh se chaman mangti rahi

sarma ki sard tira-o-tarik raat KHud

rah rah ke dar pe aag phiran mangti rahi

KHud tirgi se sahmi hui shab tamam shab

dast-e-du'a uThae kiran mangti rahi

paras mani thi nag ke munh mein chhupi hui

nagin lipaT lipaT ke wo phan mangti rahi

duniya ne hum ko jaur-o-jafa de diye 'ayaz'

is dad ke 'ewaz mein ye fan mangti rahi