bhole-pan se ye use mahfil-e-jaanan samjha

bhole-pan se ye use mahfil-e-jānāñ samjhā

hashr kī ḳhuub haqīqat dil-e-nādāñ samjhā

zindagānī ko ḳhayāl-e-shab-e-hijrāñ samjhā

maut aa.ī to use ḳhvāb-e-pareshāñ samjhā

ghar se tan kar nikal aayā ho koī mast-e-shabāb

kaun kambaḳht garebāñ ko garebāñ samjhā

roz aafat hai na.ī roz qayāmat hai na.ī

aaj tak maiñ na mizāj-e-shab-e-hijrāñ samjhā

maiñ gunahgār dam-e-hashr baḌhātā kyoñ haath

abr-e-rahmat ko magar aap kā dāmāñ samjhā

ek muddat huī kahte hue afsāna-e-ġham

aaj tak vo na mirā hāl-e-pareshāñ samjhā

dāman us shoḳh kā samjhā shafaq-e-gulgūñ ko

māh-e-nau ko kisī mah-vash kā garebāñ samjhā

aks us meñ nazar aa.e jo tirī mahfil ke

dil-e-hairāñ ko maiñ ā.īna-e-hairāñ samjhā

maiñ jo rah rah ke sunātā huuñ bayān-e-shab-e-ġham

muskurā kar koī kahtā hai ki haañ haañ samjhā

ḳhauf kuchh ahd-e-tabāhī kā na us ko 'safdar'

apne allāh ko jo apnā nigahbāñ samjhā

bhole-pan se ye use mahfil-e-jaanan samjha

hashr ki KHub haqiqat dil-e-nadan samjha

zindagani ko KHayal-e-shab-e-hijran samjha

maut aai to use KHwab-e-pareshan samjha

ghar se tan kar nikal aaya ho koi mast-e-shabab

kaun kambaKHt gareban ko gareban samjha

roz aafat hai nai roz qayamat hai nai

aaj tak main na mizaj-e-shab-e-hijran samjha

main gunahgar dam-e-hashr baDhata kyon hath

abr-e-rahmat ko magar aap ka daman samjha

ek muddat hui kahte hue afsana-e-gham

aaj tak wo na mera haal-e-pareshan samjha

daman us shoKH ka samjha shafaq-e-gulgun ko

mah-e-nau ko kisi mah-wash ka gareban samjha

aks us mein nazar aae jo teri mahfil ke

dil-e-hairan ko main aaina-e-hairan samjha

main jo rah rah ke sunata hun bayan-e-shab-e-gham

muskura kar koi kahta hai ki han han samjha

KHauf kuchh ahd-e-tabahi ka na us ko 'safdar'

apne allah ko jo apna nigahban samjha