bhula chuka hai zamana mere fasane ko

bhulā chukā hai zamāna mire fasāne ko

maiñ ro rahī huuñ magar ab bhī us zamāne ko

vo mujh se vā'da-e-fardā mirī qasam le kar

hai yaad aa gayā phir se mujhe rulāne ko

yaqīn jaan ki āñkhoñ se ḳhuun bahne lage

maiñ baiTh jā.ūñ agar hāl-e-dil sunāne ko

zamāne-bhar ke dukhoñ ko lagā liyā hai gale

ab ek pal nahīñ miltā hai muskurāne ko

vo giit jis ko mohabbat salām kartī hai

maiñ harf buntī rahī aisā giit gaane ko

vo ik jahāñ ki jise har jahāñ 'azīz rahā

janam janam se maiñ taktī thī us zamāne ko

hamāre haath se tahzīb ke guhar bhī ga.e

hamāre paas hai ab aur kyā bachāne ko

hamāre 'ahd meñ lahjoñ kā ḳhuun hotā hai

ki zaḳhm dete haiñ ham to na.e zamāne ko

tumhīñ ye kahte ho tanhā huuñ maiñ akelī huuñ

tumhāre vāste chhoḌā hai ik zamāne ko

'sabīn' zaat ke ġham se kabhī nahīñ niklī

vo phir bhī jiitī hai duniyā ke ġham uThāne ko

bhula chuka hai zamana mere fasane ko

main ro rahi hun magar ab bhi us zamane ko

wo mujh se wa'da-e-farda meri qasam le kar

hai yaad aa gaya phir se mujhe rulane ko

yaqin jaan ki aankhon se KHun bahne lage

main baiTh jaun agar haal-e-dil sunane ko

zamane-bhar ke dukhon ko laga liya hai gale

ab ek pal nahin milta hai muskurane ko

wo git jis ko mohabbat salam karti hai

main harf bunti rahi aisa git gane ko

wo ek jahan ki jise har jahan 'aziz raha

janam janam se main takti thi us zamane ko

hamare hath se tahzib ke guhar bhi gae

hamare pas hai ab aur kya bachane ko

hamare 'ahd mein lahjon ka KHun hota hai

ki zaKHm dete hain hum to nae zamane ko

tumhin ye kahte ho tanha hun main akeli hun

tumhaare waste chhoDa hai ek zamane ko

'sabin' zat ke gham se kabhi nahin nikli

wo phir bhi jiti hai duniya ke gham uThane ko