bhuk iflas se tahzibon ke dil bojhal ho jate hain

bhuuk iflās se tahzīboñ ke dil bojhal ho jaate haiñ

khet ujaḌ jaa.eñ to baste āñgan jañgal ho jaate haiñ

vaqt kā taptā sūraj sar par aa kar jab bhī chamaktā hai

dariyā se insāñ aksar kīchaḌ daldal ho jaate haiñ

jis miTTī kī god se mausam peḌ samar chhin jaa.eñ vahāñ

insāñ titlī aur parinde sab pāgal ho jaate haiñ

maiñ ne ġhurbat aur majbūrī dekhī hai maiñ jāntā huuñ

kaise dhuup ke manzar meñ giile āñchal ho jaate haiñ

tum hote ho saath mire jab koh-e-girāñ se mausam meñ

yuuñ lagtā hai bojhal din uḌte bādal ho jaate haiñ

bhuk iflas se tahzibon ke dil bojhal ho jate hain

khet ujaD jaen to baste aangan jangal ho jate hain

waqt ka tapta suraj sar par aa kar jab bhi chamakta hai

dariya se insan aksar kichaD daldal ho jate hain

jis miTTi ki god se mausam peD samar chhin jaen wahan

insan titli aur parinde sab pagal ho jate hain

main ne ghurbat aur majburi dekhi hai main jaanta hun

kaise dhup ke manzar mein gile aanchal ho jate hain

tum hote ho sath mere jab koh-e-giran se mausam mein

yun lagta hai bojhal din uDte baadal ho jate hain