بھوک افلاس سے تہذیبوں کے دل بوجھل ہو جاتے ہیں

بھوک افلاس سے تہذیبوں کے دل بوجھل ہو جاتے ہیں

کھیت اجڑ جائیں تو بستے آنگن جنگل ہو جاتے ہیں

وقت کا تپتا سورج سر پر آ کر جب بھی چمکتا ہے

دریا سے انساں اکثر کیچڑ دلدل ہو جاتے ہیں

جس مٹی کی گود سے موسم پیڑ ثمر چھن جائیں وہاں

انساں تتلی اور پرندے سب پاگل ہو جاتے ہیں

میں نے غربت اور مجبوری دیکھی ہے میں جانتا ہوں

کیسے دھوپ کے منظر میں گیلے آنچل ہو جاتے ہیں

تم ہوتے ہو ساتھ مرے جب کوہ گراں سے موسم میں

یوں لگتا ہے بوجھل دن اڑتے بادل ہو جاتے ہیں