bhul baiTha tha magar yaad bhi KHud maine kiya

bhuul baiThā thā magar yaad bhī ḳhud maiñ ne kiyā

vo mohabbat jise barbād bhī ḳhud maiñ ne kiyā

noch kar pheñk diye aap hī ḳhvāb āñkhoñ se

is dabī shaad ko nāshād bhī ḳhud maiñ ne kiyā

jaal phailā.e the jis ke liye chāroñ jānib

us giraftār ko āzād bhī ḳhud maiñ ne kiyā

kaam terā thā magar maare muravvat ke use

tujh se pahle bhī tire ba.ad bhī ḳhud maiñ ne kiyā

shahr meñ kyuuñ mirī pahchān hī baaqī na rahī

is ḳharābe ko to ābād bhī ḳhud maiñ ne kiyā

har nayā zā.iqa chhoḌā hai jo auroñ ke liye

pahle apne liye ījād bhī ḳhud maiñ ne kiyā

inkisārī meñ mirā hukm bhī jaarī thā 'zafar'

arz karte hue irshād bhī ḳhud maiñ ne kiyā

bhul baiTha tha magar yaad bhi KHud main ne kiya

wo mohabbat jise barbaad bhi KHud main ne kiya

noch kar phenk diye aap hi KHwab aankhon se

is dabi shad ko nashad bhi KHud main ne kiya

jal phailae the jis ke liye chaaron jaanib

us giraftar ko aazad bhi KHud main ne kiya

kaam tera tha magar mare murawwat ke use

tujh se pahle bhi tere baad bhi KHud main ne kiya

shahr mein kyun meri pahchan hi baqi na rahi

is KHarabe ko to aabaad bhi KHud main ne kiya

har naya zaiqa chhoDa hai jo auron ke liye

pahle apne liye ijad bhi KHud main ne kiya

inkisari mein mera hukm bhi jari tha 'zafar'

arz karte hue irshad bhi KHud main ne kiya