بھول چکا جو تجھ کو اے دل یاد میں اس کی کیوں روتا ہے

بھول چکا جو تجھ کو اے دل یاد میں اس کی کیوں روتا ہے

دنیا کا دستور یہی ہے کوئی کسی کا کب ہوتا ہے

صبح کی جانب دیکھ ابھی سے رات کے غم میں کیا روتا ہے

دنیا کی تو رسم یہی ہے پاتا وہی ہے جو کھوتا ہے

جس کو طمع نہ مال و زر کی جس کو چاہ نہ لعل و گہر کی

پیر پسارے گھر میں اپنے کتنے سکھ سے وہ سوتا ہے

یہ دنیا کب میت کسی کی یہ کیا جانے پریت کسی کی

ناحق اس کے پھیر میں پڑ کر جان کو اپنی تو کھوتا ہے

کیوں ڈھونڈے تو ملا پنڈت کیوں بھٹکے تو مندر مسجد

پچھتاوے کا تیرا آنسو پاپوں کو سارے دھوتا ہے

جس کو نظرؔ خو جور و جفا کی اس سے نہ رکھ امید وفا کی

مورکھ ہے جو بنجر میں تو گیہوں کے دانے بوتا ہے