bhul kar bhi idhar nahin aata

bhuul kar bhī idhar nahīñ aatā

vo kabhī raah par nahīñ aatā

kis kā jalva nazar se guzrā hai

ki mujhe kuchh nazar nahīñ aatā

charḳh-e-gardish se thak gayā shab-e-hijr

din nikaltā nazar nahīñ aatā

bah gayā dil to ġham nahīñ ai chashm

kaam meñ kyā jigar nahīñ aatā

huuñ shab-e-vasl is qadar be-ḳhud

bīm-e-marg-e-sahar nahīñ aatā

kis galī meñ chalā huuñ marne ko

shauq meñ kuchh nazar nahīñ aatā

terā kūcha agar bahisht nahīñ

jā ke kyuuñ nāma-bar nahīñ aatā

pher denī chhurī to aatī hai

lutf-e-sayyād agar nahīñ aatā

nau-giraftārī-e-musībat dekh

ham ko naala bhī kar nahīñ aatā

dil ko kyā jaane kyā huā 'sālik'

chain kyuuñ rāt-bhar nahīñ aatā

bhul kar bhi idhar nahin aata

wo kabhi rah par nahin aata

kis ka jalwa nazar se guzra hai

ki mujhe kuchh nazar nahin aata

charKH-e-gardish se thak gaya shab-e-hijr

din nikalta nazar nahin aata

bah gaya dil to gham nahin ai chashm

kaam mein kya jigar nahin aata

hun shab-e-wasl is qadar be-KHud

bim-e-marg-e-sahar nahin aata

kis gali mein chala hun marne ko

shauq mein kuchh nazar nahin aata

tera kucha agar bahisht nahin

ja ke kyun nama-bar nahin aata

pher deni chhuri to aati hai

lutf-e-sayyaad agar nahin aata

nau-giraftari-e-musibat dekh

hum ko nala bhi kar nahin aata

dil ko kya jaane kya hua 'salik'

chain kyun raat-bhar nahin aata