bhul mat ki gunjegi ek din sada-e-hu

bhuul mat ki gūñjegī ek din sadā-e-hū

kāġhazī ye duniyā hai aarzī haiñ rang-o-bū

kyā batā.eñ ham tum ko mādarī zabāñ kyā hai

harf-harf meñ rangat lafz-lafz meñ ḳhushbū

rahravān-e-rāh-e-haq baiTh jaa.eñ kone meñ

sāzishī dimāġhoñ kī dhūm-dhām hai har-sū

asr-e-nau ke paikar meñ ḳhud ko Dhālnā hogā

vaqt ke taqāzoñ ko Thiik se samajh le tū

rab hī ab muhāfiz hai terī kaj-kulāhī kā

raah meñ hazāroñ haiñ ek do nahīñ bad-ḳhū

bas zarā sī himmat hī tishnagī bujhā degī

rok mat qadam apne sāmne hai āb-e-jū

jab talak 'shafaq' tere haiñ zamīñ pe shaidā.ī

pesh-goī hai merī mar nahīñ sakegā tū

bhul mat ki gunjegi ek din sada-e-hu

kaghazi ye duniya hai aarzi hain rang-o-bu

kya bataen hum tum ko madari zaban kya hai

harf-harf mein rangat lafz-lafz mein KHushbu

rahrawan-e-rah-e-haq baiTh jaen kone mein

sazishi dimaghon ki dhum-dham hai har-su

asr-e-nau ke paikar mein KHud ko Dhaalna hoga

waqt ke taqazon ko Thik se samajh le tu

rab hi ab muhafiz hai teri kaj-kulahi ka

rah mein hazaron hain ek do nahin bad-KHu

bas zara si himmat hi tishnagi bujha degi

rok mat qadam apne samne hai aab-e-ju

jab talak 'shafaq' tere hain zamin pe shaidai

pesh-goi hai meri mar nahin sakega tu