bhul sakta hai unhen koi bhi aise kaise

bhuul saktā hai unheñ koī bhī aise kaise

raftagāñ dil meñ basā karte haiñ kaise kaise

jaan le kar bhī agar ḳhush nahīñ hone vaalā

koī batlā.e vo phir mānegā vaise kaise

hañste hañste vo judā.ī ko bhī sah jā.egā

zinda rah pā.eñge lekin mire jaise kaise

vo to anmol hai nāyāb hai iklautā hai

us kī tashbīh kareñ ham kisī shai se kaise

ye mire yaar kī āñkhoñ meñ rahā kartī thī

pūchhiye kuchh na huī dostī mai se kaise

zindagī ye tirī raftār ajab tarz kī hai

chalnā chāheñ to chaleñ ham tirī lai se kaise

zindagī se tujhe be-daḳhl to kar deñ jānāñ

par tū nikle bhī to nikle rag-o-pai se kaise

kis tarah koī bhulā de tujhe dekho to 'vasī'

mashvare ham ko milā karte haiñ kaise kaise

bhul sakta hai unhen koi bhi aise kaise

raftagan dil mein basa karte hain kaise kaise

jaan le kar bhi agar KHush nahin hone wala

koi batlae wo phir manega waise kaise

hanste hanste wo judai ko bhi sah jaega

zinda rah paenge lekin mere jaise kaise

wo to anmol hai nayab hai iklauta hai

us ki tashbih karen hum kisi shai se kaise

ye mere yar ki aankhon mein raha karti thi

puchhiye kuchh na hui dosti mai se kaise

zindagi ye teri raftar ajab tarz ki hai

chalna chahen to chalen hum teri lai se kaise

zindagi se tujhe be-daKHl to kar den jaanan

par tu nikle bhi to nikle rag-o-pai se kaise

kis tarah koi bhula de tujhe dekho to 'wasi'

mashware hum ko mila karte hain kaise kaise