bhule afsane wafa ke yaad dilwate hue

bhūle afsāne vafā ke yaad dilvāte hue

tum to aa.e aur dil kī aag bhaḌkāte hue

mauj-e-mai bal khā ga.ī gul ko jamā.ī aa ga.ī

zulf ko dekhā jo us aariz pe lahrāte hue

be-muravvat yaad kar le ab to muddat ho ga.ī

terī bātoñ se dil-e-muztar ko bahlāte hue

niiñd se uTh kar kisī ne is tarah āñkheñ malīñ

sub.h ke taare ko dekhā aañkh jhapkāte hue

ham to uTThe jaate haiñ lekin batā de is qadar

kis ke dar kī ḳhaak chhāne tere kahlāte hue

jhaaḌ kar dāman 'asar' jis bazm se uTh aa.e the

aaj phir dekhe ga.e hazrat udhar jaate hue

bhule afsane wafa ke yaad dilwate hue

tum to aae aur dil ki aag bhaDkate hue

mauj-e-mai bal kha gai gul ko jamai aa gai

zulf ko dekha jo us aariz pe lahraate hue

be-murawwat yaad kar le ab to muddat ho gai

teri baaton se dil-e-muztar ko bahlate hue

nind se uTh kar kisi ne is tarah aankhen malin

subh ke tare ko dekha aankh jhapkate hue

hum to uTThe jate hain lekin bata de is qadar

kis ke dar ki KHak chhane tere kahlate hue

jhaD kar daman 'asar' jis bazm se uTh aae the

aaj phir dekhe gae hazrat udhar jate hue