bhule se bhi lab par suKHan apna nahin aata

bhūle se bhī lab par suḳhan apnā nahīñ aatā

haañ haañ mujhe duniyā meñ panapnā nahīñ aatā

dil ko sar-e-ulfat bhī hai rusvā.ī kā Dar bhī

us ko abhī is aañch meñ tapnā nahīñ aatā

ye ashk-e-musalsal haiñ mahaz ashk-e-musalsal

haañ naam tumhārā mujhe japnā nahīñ aatā

tum apne kaleje pe zarā haath to rakkho

kyuuñ ab bhī kahoge ki taḌapnā nahīñ aatā

mai-ḳhāne meñ kuchh pī chuke kuchh jām-ba-kaf haiñ

sāġhar nahīñ aatā hai to apnā nahīñ aatā

zāhid se ḳhatāoñ meñ to niklūñgā na kuchh kam

haañ mujh ko ḳhatāoñ pe panapnā nahīñ aatā

bhūle the unhīñ ke liye duniyā ko kabhī ham

ab yaad jinheñ naam bhī apnā nahīñ aatā

dukh jaatā hai jab dil to ubal paḌte haiñ aañsū

'mullā' ko dikhāne kā taḌapnā nahīñ aatā

bhule se bhi lab par suKHan apna nahin aata

han han mujhe duniya mein panapna nahin aata

dil ko sar-e-ulfat bhi hai ruswai ka Dar bhi

us ko abhi is aanch mein tapna nahin aata

ye ashk-e-musalsal hain mahaz ashk-e-musalsal

han nam tumhaara mujhe japna nahin aata

tum apne kaleje pe zara hath to rakkho

kyun ab bhi kahoge ki taDapna nahin aata

mai-KHane mein kuchh pi chuke kuchh jam-ba-kaf hain

saghar nahin aata hai to apna nahin aata

zahid se KHataon mein to niklunga na kuchh kam

han mujh ko KHataon pe panapna nahin aata

bhule the unhin ke liye duniya ko kabhi hum

ab yaad jinhen nam bhi apna nahin aata

dukh jata hai jab dil to ubal paDte hain aansu

'mulla' ko dikhane ka taDapna nahin aata