bhule se kabhi le jo koi nam hamara

bhūle se kabhī le jo koī naam hamārā

mar jaa.e ḳhushī se dil-e-nākām hamārā

le jaatī hai us samt hameñ gardish-e-daurāñ

ai dost ḳharābāt se kyā kaam hamārā

kar lete haiñ taḳhlīq koī vaj.h-e-aziyyat

bhātā nahīñ ḳhud ham ko bhī ārām hamārā

ai gardish-e-daurāñ ye koī soch kī rut hai

kam-baḳht abhī daur meñ hai jaam hamārā

is baar to aayā thā idhar qāsid-e-jāñ ḳhud

sarkār ko pahuñchā nahīñ paiġhām hamārā

pahuñchā.ī hai taklīf bahut pahle hī tujh ko

ai rāh-numā haath na ab thaam hamārā

ai qāfila-e-hosh gañvā vaqt na apnā

paḌtā nahīñ kuchh Thiik abhī gaam hamārā

dekhā hai haram terā magar hā.e-re zāhid

mahkā huā vo kūcha-e-asnām hamārā

ġhilmān bhī jannat ke baḌī chiiz haiñ lekin

tauba mirī vo sāqī-e-gulfām hamārā

gul nauha-kunāñ o sanam-e-dast-ba-sīna

allāh ġhanī! lamha-e-anjām hamārā

kar baiThe haiñ ham bhuul ke tauba jo sahar ko

shīshe ko ta.āqub hai sar-e-shām hamārā

mai piinā 'adam' aur qadam chūmnā un ke

hai shaġhl yahī ab sahar-o-shām hamārā

bhule se kabhi le jo koi nam hamara

mar jae KHushi se dil-e-nakaam hamara

le jati hai us samt hamein gardish-e-dauran

ai dost KHarabaat se kya kaam hamara

kar lete hain taKHliq koi wajh-e-aziyyat

bhata nahin KHud hum ko bhi aaram hamara

ai gardish-e-dauran ye koi soch ki rut hai

kam-baKHt abhi daur mein hai jam hamara

is bar to aaya tha idhar qasid-e-jaan KHud

sarkar ko pahuncha nahin paigham hamara

pahunchai hai taklif bahut pahle hi tujh ko

ai rah-numa hath na ab tham hamara

ai qafila-e-hosh ganwa waqt na apna

paDta nahin kuchh Thik abhi gam hamara

dekha hai haram tera magar hae-re zahid

mahka hua wo kucha-e-asnam hamara

ghilman bhi jannat ke baDi chiz hain lekin

tauba meri wo saqi-e-gulfam hamara

gul nauha-kunan o sanam-e-dast-ba-sina

allah ghani! lamha-e-anjam hamara

kar baiThe hain hum bhul ke tauba jo sahar ko

shishe ko taaqub hai sar-e-sham hamara

mai pina 'adam' aur qadam chumna un ke

hai shaghl yahi ab sahar-o-sham hamara