bhule se kabhi meri jaanib jab unki nazar ho jati hai

bhūle se kabhī merī jānib jab un kī nazar ho jaatī hai

hañgāme bapā ho jaate haiñ aalam ko ḳhabar ho jaatī hai

merī shab-e-furqat kī zulmat marhūn-e-tajallī ho na sakī

hogī vo kisī ke vasl kī shab jis shab kī sahar ho jaatī hai

kuchh din aise bhī aate haiñ kaaTe se nahīñ jo kaTte haiñ

kuchh aisī bhī rāteñ aatī haiñ bātoñ meñ sahar ho jaatī hai

shamshād khaḌā muñh taktā hai hairānī-e-nargis kyā kahiye

gulzār meñ jab vo aatā hai us gul ko nazar ho jaatī hai

e.ajāz-e-tajallī to dekho vo sāmne jab aa jaate haiñ

betābī-e-dil baḌh jaatī hai taskīn-e-jigar ho jaatī hai

maiḳhāne meñ sab kuchh miltā hai ye shaiḳh-o-barahman kyā jāneñ

yuuñ dair-o-haram ke jhagḌoñ meñ ik umr basar ho jaatī hai

vo shauq bharī nazreñ uTh kar ik hashr bapā kar detī haiñ

duniyā-e-mohabbat kī har shai tab zer-o-zabar ho jaatī hai

jab shauq kī āñkhoñ meñ raqsāñ kaunain ke jalve hote haiñ

manzil vahīñ ḳhud khiñch aatī hai takmīl-e-safar ho jaatī hai

bhule se kabhi meri jaanib jab un ki nazar ho jati hai

hangame bapa ho jate hain aalam ko KHabar ho jati hai

meri shab-e-furqat ki zulmat marhun-e-tajalli ho na saki

hogi wo kisi ke wasl ki shab jis shab ki sahar ho jati hai

kuchh din aise bhi aate hain kaTe se nahin jo kaTte hain

kuchh aisi bhi raaten aati hain baaton mein sahar ho jati hai

shamshad khaDa munh takta hai hairani-e-nargis kya kahiye

gulzar mein jab wo aata hai us gul ko nazar ho jati hai

eajaz-e-tajalli to dekho wo samne jab aa jate hain

betabi-e-dil baDh jati hai taskin-e-jigar ho jati hai

maiKHane mein sab kuchh milta hai ye shaiKH-o-barahman kya jaanen

yun dair-o-haram ke jhagDon mein ek umr basar ho jati hai

wo shauq bhari nazren uTh kar ek hashr bapa kar deti hain

duniya-e-mohabbat ki har shai tab zer-o-zabar ho jati hai

jab shauq ki aankhon mein raqsan kaunain ke jalwe hote hain

manzil wahin KHud khinch aati hai takmil-e-safar ho jati hai