bhulte jate hain yaadon mein samane wale

bhūlte jaate haiñ yādoñ meñ samāne vaale

jaise ab vāqa.ī ruḳhsat hue jaane vaale

saa.e ke vāste ta.amīr kareñge phir log

dhuup ke vāste dīvār girāne vaale

rā.egāñ ahd-pas-e-ahd ga.ī qurbānī

ḳhūñ-bahā le ga.e ḳhud ḳhuun bahāne vaale

vaqt ko saath liye aa.e yahāñ tak ham hī

ho ga.e log hamīñ agle zamāne vaale

ye jahāñ ek baḌe khel kā pas-manzar hai

sab nazar aate haiñ kirdār fasāne vaale

yā to suqrāt hai ab maslahatan muhr-ba-lab

log hī mar ga.e yā zahr pilāne vaale

jo zamāne kī samā.at pe girāñ lagtī hai

ham to 'shaukat' haiñ vahī baat sunāne vaale

bhulte jate hain yaadon mein samane wale

jaise ab waqai ruKHsat hue jaane wale

sae ke waste tamir karenge phir log

dhup ke waste diwar girane wale

raegan ahd-pas-e-ahd gai qurbani

KHun-baha le gae KHud KHun bahane wale

waqt ko sath liye aae yahan tak hum hi

ho gae log hamin agle zamane wale

ye jahan ek baDe khel ka pas-manzar hai

sab nazar aate hain kirdar fasane wale

ya to suqraat hai ab maslahatan muhr-ba-lab

log hi mar gae ya zahr pilane wale

jo zamane ki samaat pe giran lagti hai

hum to 'shaukat' hain wahi baat sunane wale